*18. nowembra 1875 w Drježdźanach ; † 30. junija 1925 tež tam

Jako William Krause w starobje 49 lět nadobo zemrě, zhubi swět wuměłstwa molerja, kotrehož móžemy z prawom mjenować pućrubarja noweho zrozumjenja wuměłstwa. W srjedźišću jeho tworjenja njesteješe romantiske překrasnjenje burskeho wšědneho dnja, ale jednory, ćežko dźěłacy lud a jeho žiwjenje a dźěło. Slepjanscy Serbja pak přez jeho zažnu smjerć wo wjele wjace zhubichu. Mnozy po jeho woteńdźenju na prawdu Božu wo swojeho molerja žarowachu, kotryž běše so chutnje a wuspěšnje prócował dodnić jich bytostne žro, haj kotremuž běchu woni tež swój nutřkowny swět wotewrěli. A to dźě chce pola Serbow něšto być!

Bujnosć barbow a drastow, serbski dwór a domjacy naporjadk drje tež druzy molerjo zwobraznjowachu; žadyn z nich pak njetrjechješe lěpje bytosć tutych ludźi z jich zawrjenosću, jich wutrajnosću w powołanskim dźěle kaž tež jich hłuboko sahacej, wobstajnej pobožnosću a zo so kruće dźeržachu swojich starodawnych wašnjow a nałožkow. Zo bě wuměłc we nich hłuboko zakorjenjeny, zo bě wšón wupjelnjeny wot žiwjenja a wosuda swojich modelow, wot nutřkowneho zrozumjenja, tole najjasnišo wuchadźa z fakta, zo woni jeho nihdy nanihdy njemějachu za wobćežneho nawalnika abo zadobywarja.