W swójskim nakładźe ENA wuda komponist Jan Pawoł Nagel (1934–1997) w lěće 1992 ze spěchowanjom Załožby za serbski lud swoju prěnju cejdejku z dwaceći wubranymi titulemi komorneje hudźby. Komponist přisłušeše w druhej połojcy 20. lětstotka ke kruhej produktiwnych serbskich wuměłcow a běše nimoměry popularny hudźbnik. Po politiskej změnje so prócowaše, hudźbu Serbow do europskeho konteksta zwjesć. Běše wusko ze swojej domiznu zwjazany, a tak maja jeho kompozicije zdobom jasny poćah ke kulturje Serbow.

Cejdejka je tohorunja hommage na spěwneho solista Pawoła Šołtu. Z nim běše komponist přez lětdźesatki w Serbskim ludowym ansamblu dźěłał. Tak předstaja so na zynkonošaku ›Pjeć chutnych spěwow‹ na teksty Uty Mauersberger ›Es fällt um mich der Wälderkranz‹, Pětra Malinka ›Nazyma/Herbst‹ (kotryž je přełožiła Elke Nagel), Kristiana Pecha ›Als der Komponist spielte‹, Rainera Maria Rilke ›Herbsttag‹ a Johannesa Bobrowskeho ›Letztes Boot‹. Na klawěrje přewodźa spěwarja Liana Bertók, kotraž je tohorunja mnohe lěta w SLA spomóžnje skutkowała.