Serbski institut swjeći 2026 swój 75. jubilej. Při tej składnosći wozjewimy w Rozhledźe seriju z wuzwolenymi slědźerskimi ćežišćemi, kotrež běchu historisce wažne a hraja zdobom dźensa hišće bytostnu rolu při sorabistiskim slědźenju.
Serbski institut a pisomne dokumenty serbšćiny
Wot spočatkow wobstaća Serbskeho instituta (SI) hač do dźensnišeho su so rěčespytnicy – a nic jenož woni – na najwšelakoriše wašnje ze serbskorěčnymi dokumentami rozestajili. Přeslědźeli su při tym historiske ćišće a rukopisy runje tak kaž aktualne digitalne spisy.
Přez lětstotki běchu teksty (nimo ertneho traděrowanja) jenička móžnosć, informacije – a z tym kulturelnu wědu – posrědkować. Ze zwěčnjenjom rěče na papjerje pak je so zdobom cyły rjad linguistisce zajimawych elementow zwěčnił. Z tutych dźělčkow hodźi so z chwilemi starši staw rěče rekonstruować. Druhdy móže so tekst, je-li pochad njejasny, přez přirunanje z pozdźišim dialektalnym stawom zhruba geografisce přirjadować.
