Kritiske přepruwowanje tezy wo farje při serbskej cyrkwi

Na prašenje, hdźe Michał Hórnik w Budyšinje bydleše, by wjetšina čitarjow zawěsće takle wotmołwiła: »Wězo na farje při serbskej cyrkwi.« Ale bě tomu woprawdźe tak?

Bydlenje při serbskej cyrkwi – što rěči za to?

Přeswědčenje, zo měješe Michał Hórnik jako kapłan – druhi wot 1861, prěni wot 1864 – a wot 1871 jako farar Budyskeje serbskeje cyrkwje swoje bydlenje při tamnišej cyrkwi, zwisuje drje z tym, zo bydleše wosadny farar serbskeje cyrkwje hač do přirjadowanja wosadow Našeje lubeje Knjenje a swjateje Klary do jeničkeje tachantskeje wosady w lěće 1984 woprawdźe tu, mjenujcy pod adresu Cyrkwinske naměsto 2. Hač do srjedź 1990tych lět eksistowaše tam hišće farski běrow. Tohodla drje tež nichtó hač dotal na wuprajenju Jana Petra w jeho wobšěrnej biografiji wo Hórniku njedwělowaše. Wón pisaše: »Najprjedy bydleše [Hórnik] w chěži při Pětrowej cyrkwi, pozdźišo – wot započatka 60. lět – na farje serbskeje katolskeje cyrkwje.« (Petr 1974, 52; wuzběhnjenje A.P.) Někotre strony dale čitamy: »Jeho fara sta so srjedźišćo serbskeho kulturneho žiwjenja.« (tež tam, 58; wuzběhnjenje A.P.)