▶ Hriby tu a cyle druhdźe

W holi blisko móličkeje wjeski Wotpočink w Malešanskej gmejnje je so 19. septembra projekt »Swětnišćo zetkawa přirodu« wotměł. Zaměr zarjadowanja, kotryž staj rěčny motiwator projekta Zari Lucian­ Kaulfürst a fyzikar Jan Winša přewjedłoj, bě, wo hribach w lěsach a wo hribach w swětnišću informować. Zajimcy zhonichu tójšto wo aktualnych slědźenjach, dóstachu pak tež praktiske pokiwy za rozeznawanje sebi jara podobnych jědźnych a jědojtych hribow.

▶ Rozestajenje ze serbskimi tradicijemi w Podstupimje

Kónc septembra bu wustajeńca »Nacasne serbske ­wuměłstwo – Načasne ­serbske wuměłstwo – ­Zeitgenössische sorbische Kunst« w Podstupimskim Domje wuměłstwa ­wotewrjena. Přehladka pokazuje twórby cyłkownje dźesać čłonkow a čłonow Kolektiwa Wakuum resp. informelneho zjednoćenstwa NSK Lipsk. Wjetšina eksponatow, mjez kotrymiž su instalacije, asemblaže, fotografije, mólby, plastiki a wutřihanki, je w minjenych měsacach nastała­ a so we wustajeńcy prěni raz zjawnje prezentuje. Kaž rozdźělne wudźěłki na přikład Ulriki Lux, Helle Stoleccyc,­ Bernharda Schippera,­ Luki Lětka abo Karoliny Krawcec tež byłe­ – za wšitkimi chowa so kritiske rozestajenje ze serbskimi tradicijemi. Zwjazowacy element tohole »subkulturneho integralizma«, kaž Alexander Pehlemann wobsah přehladki, kotruž bě jako hłowny iniciator sobu přihotował, zjima, je »swobodne wuznaće k serbstwu«.