W Serbskim kulturnym archiwje namaka so wjace hač 100 spěwow Bjarnata Krawca za jedyn abo dwaj solowej hłosaj z klawěrnym přewodom. Zwjetša jedna so wo chětro ćežko čitajomne wotpiski twórbow, kotrež bě Krawc přećelam do tehdyšeje Čěskosłowakskeje słał – jako by hižo wědźał, zo w nocy 13. februara 1945 w Drježdźanach přez bombardowanje wšón swój mětk a statk přisadźi.

Přewažnje zhudźbni Krawc twórby Jakuba Barta-Ćišinskeho a Michała Nawki, nimo toho Handrija Zejlerja, Mata Kosyka, Jana Skale, Miny Witkojc, Arnošta Muki, ale tež literarne wupłody mnohich druhich zdźěla pozabytych basnikow. Spřistupnjenje tutych manuskriptow wužaduje sej wulku ekspertizu. W teamowym dźěle a z wotpowědnej fachowej wědu so wot lěta 2025 krok po kroku publikowanje Krawcowych wuměłskich spěwow realizuje. Mnohe z tutych twórbow so najskerje hišće ženje zjawnosći předstajili njejsu.

Prěni zwjazk wobsahuje 11 solowych spěwow na basnje Jakuba-Barta Ćišinskeho z klawěrnym přewodom. Tute twórby, kiž su za nas dźensa dźěl serbskeho ludoweho kubła, bě Krawc w 1920tych a 1930tych lětach skomponował, a kompleksnosć zwjetša ćežko čitajomnych rukopisow drje sobu wo tym rozsudźi, zo wosta tutón dźěl serbskich kulturnych stawiznow telko lět njedótknjeny. 23 zhudźbnjenych tekstow Michała Nawki su krótko do dokónčenja.