▶ Serbski komponist a něgajšny muzikowy redaktor Ulrich Pogoda njabogi

Wušej 30 lět jo Pogoda był muzikowy redaktor, nejpjerwjej w radiju DDR, pótom w ORB a až do swójogo wuměńka 2019 w chóśebuskem studiju rbb. Ako komponist jo był nadregionalnje pśipó- znaty. Wón jo komponěrował za orchestry, za jawišćo a komornu muziku. Dnja 31.8. jo w starstwje 72 lět zemrěł, 18. septembera jo namakał swój slědny wótpócynk w rodnem měsće, na kulowskem kjarchobje.

▶ Stwórty lětnik rěcnego projekta Zorja jo se zachopił

1. septembera su se zasej wótwórili źurja rěcnego gnězda Zorja w Děsnje. Mjaztym jo južo stwórty lětnik z wósym wobźělnicami a wobźělnikami startował, a źaseś mjasecow lažy prědk nowych Zorjakow. Zasej pódla su rěcne trenarje Franciska Albertowa, Pětš Śěžyński, Anka Zachariasowa a Gregor Wieczorek, a źěl teama jo něnt teke Dešanaŕka Šarlota Kušcyc.

▶ Łužyski lyrikowy festiwal w Złem Komorowje wót 2. do 6. septembera

Lětosne mjaztym 14. wudaśe festiwala, kenž wugótujo »Nachwuchs-Literatur-Zentrum ›Ich schreibe!‹ e.V.« w zagrodowem měsće Marga w złykomorojskem měsćańskem źělu Brjazki, jo měło wósebnje wjele serbskego bitowaś. Dwě serbskej basnikaŕce stej se wobźěliłej: Róža Domašcyna a Źilka. Muzicěrowałej a spiwałej stej Marion Kwicojc a Konstanze Niemtz.