Zažnu nazymu 2024 je so team studija LUCIJA prěni raz na puć podał k swědkam časa, kotřiž na zajimawe a čiłe wašnje wo serbskej zašłosći rozprawjeć wědźa. Jich přinoški je sobudźěłaćer LUCIJE Michał Cyž z kameru nahrawał. Z kolegu Janom Breindlom je dotalnych wosom interviewow do něhdźe 100 tematiskich klipow střihał.

Wot lětušich jutrow móže sej je kóždy zajimc na web-stronje www.kalajdoskop.de wobhladać. Nimo na kanalu Youtube šěri so projekt tež na instagramje LUCIJE, wo čož so Franciska Včelichowa stara. Ideju za projekt »kalajdoskop časowych swědkow« bě zrodźił jednaćel SŠT a studija LUCIJE Andreas Ošika, kotryž je 5. februara 2025 njenadźicy zemrěł.

Čemu kalajdoskop słuži? Po puću nowych medijow spřistupnja tež młódšej generaciji dopomnjenki Serbow na po-dawki, kotrež oficialny stawiznopis cyle wosobinsce, cyle subjektiwnje­ ilustruja. Jako tematiske ćežišća su so w rozmołwach wukristalizowali: Serbja za čas nacionalsocializma a wójny, cyrkej, šula a wukubłanje tehdom kaž tež za čas NDR, dźěło a wosobinske wobkedźbowanja hladajo na wobstejnosće, kotrež su za wěstu dobu typiske. Ale tež k našemu časej so někotryžkuli swědk wupraja. Po tutych kategorijach móža so zajimcy na web-stronje rozhladować abo so prosće po wosobach informować.