Chorzów. Muzej-skansen »Hornjošleski etnografiski park w Chorzówje« bě dnja 26. a 27. hapyrleje 2025 druhi króć městnosć za konwent domoródneje kultury SLAVNI.
Tole je najwjetše zarjadowanje w Pólskej, kotrež skića zjawnosć a zhromadnosć přiwisnikam starosłowjanskich, nordiskich a keltisko-german-skich stawiznow a pólskeje ludoweje kultury. Na něhdźe połsta stejišćach skićachu so tematisce přiměrjena literatura a debjenki, mólby, kreslenki, drjeworězby, lěkarstwa z přirody, na słowjanski srjedźowěk wusměrjene drasty a wudźěłki słowjanskeje mytologije.
Na jednej łuce mjez starymi drjewjanymi burskimi chěžemi etnografiskeho parka zaměstnichu so stany za přiwisnikow dawneho słowjanstwa, kotřiž so zdrasćichu kaž Słowjenjo w srjedźowěku. Na předań pak běchu tež serije t-shirtow z wuměłsce načasnje wuhotowanymi wobrazami słowjanskich mytiskich bytosćow, mjez druhim z dźowku wódneho muža, z připołdnicu a z přibohom Swarogom. Na łuce zetkachu so w chłódku štoma awtorki a awtorojo fantastiskich a historiskich romanow ze swojimi čitarjemi. Na jednym z burskich dworow skansena zhromadźichu so prokownicy, mjez nimi nahladna skupina młodych žonow.
