Pospyt stawizniskeho přehlada

Prolog

Hnydom po přewróće dožiwich na žurli Wojerowskeho hrodu smjerć zajimawe zarjadowanje z tehdyšim serbskim ewangelskim superintendentom Janom Malinkom. Přednošowaše na jimace wašnje wo stawiznach serbskeho hibanja we Wojerecach. Prěni raz słyšach wo tym, zo mějachu Wojerecy serbski knihićišć a zo hraješe tón wosebje w druhej połojcy 19. lětstotka wažnu rólu w Serbach. Někak 30 lět pozdźišo rešeršuju jako wuměnkar wo serbskich stawiznach Wojerec a spytam we wobłuku projekta ›Via Sorabica HoyWoj‹ moje dopóznaća tež druhim zajimcam sposrědkować.

Dźěl tutych rešeršow su stawizny serbskeho knihićišća we Wojerecach, kotrež w našim měsće tež Serbam lědma znate su. W rjedźe ›Neue Hoyerswerdaer Geschichtshefte‹ wozjewichu w čisle 16 (2013) nastawk wot Elke Rosch-mann ›Die ersten Hoyerswerdaer Zeitungen‹. W nim wona tež slěd ćišćernjow we Wojerecach wopisa. Ale čitar njezhoni ničo wo tym, zo ćišćachu wone nimo němskich tež serbske nowiny, časopisy a knihi. Tutón brach spytam na zakładźe dotalnych, wězo hišće njedospołnych dopóznaćow z předležacym artiklom sporjedźeć.