Pod titulom ›Sorbian Monuments. A Guide to Memorial Sites in Europe, America and Australia‹ je w USA wušła kniha wo serbskich pomnikach w jendźelskej rěči.

Kniha wopřija 332 stron, ma krutu wobalku a je bohaće z fotami kaž tež z kartomaj wo serbskich wopomnišćach w Hornjej a Delnjej Łužicy wuhotowana. We hłownym jedna so wo přełožk přiručki, kotraž bě w LND w lěće 2019 w serbskej a 2022 němskej rěči wušła. Přidatnje su do jendźelskeje wersije někotre dalše serbske wopomnišća w Texasu přiwzate. Teksty ze serbšćiny přełožił je jendźelski slawist Gerald Stone z Oxforda. Přełožki z němčiny je přewzał David Zersen, bywši prezident Concordia University Texas. Wudałoj stej ju nakładnistwje Concordia University Press w texaskej stolicy Austinje a The Wendish Press w Serbinje.

Lucretia Brězanec-Wjacławkowa – »wjes 1« – 2022, acryl na papjerje.

Putacy dyrdomdej, kiž čitarki a čitarjow kóždeje staroby zahorja a k rozmyslowanju pohnuwa.Młody a njewjazany dóstanje so Krabat do putow čorneho mištra. W Kózłom zeznaje poněčim mašineriju čorneho młyna, kotrejž so po zdaću wuwinyć njemóžeš. Přewodź Krabata a spóznaj hromadźe z nim a druhimi młynskimi, kotre mocy kuzłanje ma a kak zahubny režim přez hłuboke přećelstwo, solidaritu a lubosć přewinješ. Nětko předleži mištersce napisany roman tež hornjoserbsce z ilustracijemi Evy Gaeding. Přełožiłoj staj ju Dušan a Lubina Hajduk-Veljković, kniha je wušła w nakładnistwje Veles. Kapsnu knihu poskićujetej Smolerjec kniharnja a SKI za 15,00 €, dóstanjeće ju tež jako ebook za 9,95 € na stronje veles-verlag.de.

Twórbje Měrki Pawlikoweje na nutřkownymaj wobalkomaj (»Wětry« a »Wona«) stej so zaměniłoj – tuž tež titulej njetrjechitej.

ISSN 0943-2787 Rěče artiklow: němsce, hornjoserbsce, jendźelsce bibliografiske podaća: zešiwk 71/2024, 203 str. 20,00 €.Zběrnik »Lětopis – Časopis za sorabistiku a přirunowace mjeńšinowe slědźenje« je ze zhromadźenymi přinoškami lěta 2024 nětko tež w ćišćanej formje w Ludowym nakładnistwje wušoł. Zajimcy móža sej jón w Smolerjec kniharni kupić abo skazać. Wšitke artikle su pod www.lětopis.de wozjewjene a dale swobodnje přistupne (open access).

Aktualne wudaće wědomostneho časopisa Serbskeho instituta Lětopis 71/2024 wopřija zaso rjad přinoškow k aktualnym slědźenjam na polu mjeńšinowych wědomosćow, sorabistiskeho rěčespyta a kulturnych stawiznow, kotrež su so w běhu lěta 2024 online wozjewili.

▶ Wuměłstwowy bus do Ochranowa a wokoliny

Wuměłstwowy bus tež lětsa zaso turu po Hornjej Łužicy jědźe. Stacije busa budu 16. a 17. awgusta 2025 hród hrabje Zinzendorfa w Berthelsdorfje, pohrjebnišćo a muzej za ludowědu w Ochranowje, měšćanski muzej a dwórnišćo w Lubiju kaž tež hrodaj w Krobnitzu a w Hrodźišću. Projekt podpěratej wospjet zaměrowy zwjazk Hornja Łužica/Delnja Šleska (ZVON) a wobchadny zwjazk Hornje Łobjo (VVO). Iniciatiwa Wuměłski bus pěstuje mjez druhim kooperacije z Łužiskim festiwalom a z projektom »Herbstwo Łužicy«.

▶ Wuspěšne knižne wiki za łužiske nakładnistwa

Łužicu prezentowachu na lětušich knižnych wikach wot štwórtka, 27. měrca do njedźele, 30. měrca, pjećo wudawaćeljo. Facit Kamjenskeho Muzeja zapadneje Łužicy, nakładnistwa Guntera Oettela ze Zhorjelca a Budyskeho nakładnistwa Neissuferverlag je hladajo na nawal zajimcow dosć pozitiwny. Stejnišćo Njebjelčanskeho towarstwa »Dowol na kraju w Sakskej«, je tójšto ludźi wopytowało. Woni wabjachu ze swojimi publikacijemi za turistiske atrakcije Łužicy. Tež Ludowe nakładnistwo Domowina je syły ludźi přiwabiło. Na prěnimaj dnjomaj wukopachu so zběrka »Die Lausitz in Reisebeschreibungen des 18. und 19. Jahrhunderts« Uwe Hentschela a knihi wo serbskich jutrach jako faworića publikuma.

Měrka Pawlikowa – »Wětry« – 2022, wolijowa barba na papjerje, 70 × 50 cm.

▶ Finisaža wustajeńcy a awkcija na dobro młodźiny

Finisaža wustajeńcy plakatow přiwabi sobotu, 01. měrca, zajimcow do »dobreje jstwy« Budyskeho towarstwa Dźěłań dźeń. Plakaty běše spěwy­twórc Paul Geigerzäh-ler w minjenych 20 lětach přewažnje za swójske zarjadowanja zhotowił. Zakónčenje přehladki běše zdobom awkcija wubranych eksponatow. Anekdotisce pozadki wo kóždym objekće podawši, wjedźeštaj Geigerzähler a Florian Kaulfürst po njej. Najbóle požadane běchu wabjenske postery za koncertaj pod hesłom »Wočiń woči – Zhromadnje přećiwo rasizmej a fašizmej«, křidoćišć prěnjeje pokazki na rjad »Hody nimo – Punkrock fever­« a unikatna reprodukcija konterfaja Marje Grólmusec. Pjenjezy přewostaja Budyskemu samo zarjadowanemu młodźinskemu klubej Kurti, kotryž je tuchwilu bjez kruteho domicila.

Wo hudźbne wobrubjenje awkcije-finisaže postarachu so Geigerzähler ze swójskimi spěwami a wjacorymi titulemi skupiny Berlinska dróha kaž tež Jacke Schwarz a Willy Wilson, mjez druhim z akustiskimi wersijemi přinoškow tačele »Witaj«.

▶ Składnostnje jubileja

Chróšćanski wjesnjanosta Marko Kliman a farar Měrćin Deleńk přepodaštaj srjedu, 05. měrca, Budyskemu diecezanskemu archiwej prěnju slěbornu medalju, kotraž je składnostnje 800. jubileja Chróšćanskeje wosady a tamnišeje gmejny wušła. Nimo toho sposrědkowaštaj listowe znamki předewzaća Post modern, kotrež su tohorunja k jubilejej wušli.

Z wutrobu a rozumom

powěsćam słuchać

Přibliženje na psychologiski wobsah powěsćow

čas: pjatk, 13. junija 2025, wot 18 hodź. hač do njedźele,

15. junija, 13 hodź.

městnosć: Stróža pola Budyšina, Dom 1000 hatow (kubłanski centrum biosferoweho rezerwata »Hornjołužiska hola a haty«)

Česćene knjenje a

česćeni knježa,

w starych powěsćach a bajach, swojich figurach a jich dožiwjenjach namakamy wuraz a formu, kotruž dźensniši dźeń »energija«­ mjenujemy. Něhdy pak mjenowachu tole »swětło přirody«. Na Druhim łužiskim powěsćowym sympoziju chcemy so powěsćowym kruham domjacych zmijow »zmij« a »plon­« kaž tež »spodźiwnej kwětce« přibližić.

Kóždy indiwiduum steji před nadawkom, so jako dźěl kruha dawanja a branja zapřimnyć a wobě róli zabrać. Wobjednane powěsće skića nam pokiwy, kak móže jednotliwc z tutymi mocami wobchadźeć.

Přeprošamy Was tuž na fachowe přednoški, na zhromadnu wuměnu a trochu towaršliwosće.

Smolerjec kniharnja přihotuje sobotu za nas knižne blido z literaturu wo sympoziju.

wědomostny přewod:

towarstwo Carla-Gustava-Junga

Sakska z.t.

organizatoriske:

Wot zašłeje hłowneje zhromadźizny 9. měrca 2024 zetka so předsydstwo regularnje pjeć króć. Planowane zetkanje w Delnjej Łužicy w nowembru zašłeho lěta dyrbjachmy terminowych ćežow dla do nalěća přesunyć.

Aktualnje mamy 105 čłonow. Wot zašłeje hłowneje zhromadźizny sem zemrěchu třo čłonojo, jedyn čłon starobnych přičin dla wustupi, třo přistupichu.

Sponsoram Maćicy Serbskeje kaž tež wšitkim darićelam darneho abonementa Rozhlada so wutrobnje dźakujemy.

Dźěłowe ćežišća 2024/2025

Předźěłanje wustawkow

Po wólbach w zašłym lěće zrjadowachmy najprjedy wšitke z nimi zwisowace prawniske naležnosće a koncentrowachmy so po tym na předźěłanje wustawkow. W prěnim kroku zaběraše so z nowym naćiskom mjeńša skupina, kotrejž přisłušeštaj nimo předsydki Cordula Ratajczakowa a Robert Lorenc. Po tym wuradźowachmy w cyłym předsydstwje wo změnach. Naćisk dachmy nazymu 2024 wot financneho zarjada a hamtskeho sudnistwa pruwować. Namjet za nowu wersiju towarstwowych wustawkow dóstachu čłonojo z přeprošenjom.

Krótkobiografije Maćicarjow

Dale smy naćisnyli přehlad za krótkobiografije našich čłonow. Na hłow­nej zhromadźiznje Maśicy Serbskeje w Choćebuzu loni w aprylu namjetowaše čłonka, zo móhli čłonow wo podaće najwažnišich biografiskich datow inkl. powołanskeho a čestnohamtskeho skutkowanja prosyć. W zašłych lětach smy mjenujcy husćišo zwěsćili, zo je druhdy jara ćežko, na přikład za kulojte narodniny abo nekrologi, zakładne informacije wo skutkowanju našich čłonow wuslědźić. Tohodla prosymy z dźensnišim dnjom wšitkich našich čłonow wo dobrowólne přidźěło, to rěka wo wupjelnjenje »formulara za podaće krótkobiografije«. Podłožki budu jenož za předsydstwo digitalnje přistupne; paralelnje k tomu chowamy wućišće w Maćičnym archiwje.