Rafael Ledźbor Foto: Hanka ŠěnecJe serbska rěč za system relewantna? Tele prašenje je mje zaběrało, jako so w zwisku z koronowej krizu wo powołanjach rěčeše, kotrež su za system relewantne. Wšitcy běchu sej přezjedni, zo słušeja k nim samozrozumliwje mediciniski personal a wšitcy, kotřiž ludnosć z najnuznišim zastaruja. Poněčim je paleta mjenowacych powołanjow přiběrała. Njejsym pak ženje na wědomje brał, zo by něchtó k tomu rěč narodneje mjeńšiny ličił.

Wězo njeje strowotniski a hospodarski system wot rěče małeho ludu wotwisny. Ryzy formalnje widźane, njejsmy jako Serbja za wobstaće towaršnosće relewantni. Relewantni su po tym jeničce Serbja, kotřiž wukonjenja wotpowědne powołanja. Njeparujomni wšak njejsu swojeje narodnosće, ale swojeje fachoweje kompetency dla.