We wuznamnym němskim časopisu »Publik-Forum – kritisch, christlich, un-abhängig«, namakaš w najnowšim wudaću wulki nastawk wo burskich wójnach w Němskej před 500 lětami. Wězo je tam rěč wo wulkich zběžkach burow, kotrež so najprjedy w Šwabskej wotměwachu. Tam běše so, kaž wopisa tehdomniši chronist Johannes Kessler, pječa 30 000 burow zhromadźiło. Mjezy nadpismo wobšěrneho nastawka rěka »Prěnja němska rewolucija« a na prěnimaj stronomaj je pod nadpismom wulki dwustronski pisany wobraz jako wurězk hoberskeje mólby. Ju je NDR-ski moler Werner Tübke w Panorama-muzeju w Bad Frankenhausenje zhotowił.

A wězo dopomnich so na wučbu stawiznow na Serbskej wyšej šuli, hdźež běchmy wo burskich zběžkach w Serbach rěčeli. Ale mamy mjez tym »Sorbisches Kulturlexikon« a tež tam je wobšěrny nastawk wo burskich zběžkach pola nas a hišće dalši wosebity: wo roboćanstwje. Wón započina so z definiciju burskich zběžkow: »Jedna so wo najkonsekwentniše wašnje spjećowanja burskeho wobydlerstwa přećiwo roboćanstwu a druhim formam socialneho a ekonomiskeho potłóčowanja.« Dale je rěč wo tym, kak wuklukowanje burow přiběraše, kotřiž běchu dźědźičneho poddanstwa dla kruće na swoju pódu wjazani. Prěni mjenowany zběžk w Serbach bě tež hižo před 500 lětami, mjenujcy lěta 1525.