sym mějićel
hłowopusćiny
hdźež je swobodne
mam tež
črjewoprózdnoty
hdźež je hownotne
PAVEL ZAJÍČEK
přebasnjenje: RADEK ČERMÁK
PAVEL ZAJÍČEK (*1951) je jedna z najwuznamnišich wosobinow čěskeje undergroundoweje kultury 1970tych lět. Je basnik, tworjacy wuměłc a sobuzałožer hudźbneje formacije DG 307. Swojeho wuměłskeho tworjenja dla bu wot komunistiskeho režima zajaty. Tu wozjewjene basnje su ze zběrki «Zápisky z podzemí» (Praha: Torst, 2002).što za tej stawiznu čłowjeka poprawom tči?
tu je móst a tam je kónc
tu je swětło a tam je twój sćin
tu sej wusnješ a tam to derje znaješ
tu je murja a tam běži čas
tu so wšo započina a tam su dopomnjenki
tu je błudźišćo a tam běži čas
a tu su słowa słowa a tam je twoje wobličo
tu je hladawko a tam je twój sćin
tu je móst a tam je kónc
tu so wšo započina a tam su słowa słowa
što za tej stawiznu čłowjeka poprawom tči?
PAVEL ZAJÍČEK
přebasnjenje: RADEK ČERMÁK
ty prajiš: što na tym je?
zo kóždy w sebi nosy někajku žedźbu
njenapisanu knihu, són
ty prajiš: što na tym je?
zo kóždy w sebi nosy někajku ćišinu
ty prajiš: što na tym je?
zo kóždy w sebi nosy někajke swětło
ty prajiš: što na tym je?
zo kóždy w sebi nosy někajku zrudobu
ty prajiš: što na tym je?
zo kóždy w sebi nosy někajki puć
kaž na dłóžbje so wotraža rytmus
ty prajiš: a što na tym je?
ty prajiš: što na tym je?
PAVEL ZAJÍČEK
přebasnjenje: RADEK ČERMÁK
