Magdalena Jankowska

lyrikarka, esejistka a kritikarka dźiwadłowych tekstow w Lublinje

hdyž čita baseń

kotruž je přełožił

je słyšeć zo je z wutrobu

při dźěle

hdyž čita baseń

kotruž je sam spisał

je słyšeć zo ma wutrobu

na jazyku

+++

klunkotate linije pahórkow

mjechke wužłobki dolin

ćěła po lub’wanju hdyž són

hnydom do spara stupi

a jón wožiwi

MAGDALENA JANKOWSKA   

z pólšćiny přebasniła: RÓŽA DOMAŠCYNA   

MAGDALENA JANKOWSKA (* 1953 w Puławach w Pólskej) je lyrikarka, esejistka a kritikarka dźiwadłowych tekstow­, jeje prěnja basniska zběrka wuńdźe 1990, jeje dotal poslednja z nastawkami a kritikami »Tak, widziałam to. Tak to widziałam« w lěće 2016.

hdyž běchmy dźěći hrajachmy wójnu

dźensa wuwołamy přiměr

snědanje w trawje

zwučowanišća

žane zakopy

žane płoty z kałateho grota

brodawki salutěruja

do škitnika dłóni

MAGDALENA JANKOWSKA  

z pólšćiny přebasniła:RÓŽA DOMAŠCYNA