ptaški swajźbuju

dłymoko zadychuju

te sebjewědobne

ptaški noweje

generacije

scena se pśigótujo

njewjesta wustupijo

jo lapata njej wijkotata

w zecu lěpjej lětajuca

stup dalej na jawišćo  

wšo

how wótrěte wót procha jo

to ga bźo

błyšćate tšojeńko

daś se wóno chopijo

ze serbskim gusłom Łužyce

a ja do sroki słodkeje

z radosću

kusnuś cu    

  ŹILKA

Pokazka: Wšykne pśedstajone wobraze móžośo se woglědaś w aktualnej wósebnej wustajeńcy » Ze žeńskecym póglědanim« w Serbskem muzeju Chóśebuz. Twóŕby styri wuměłcowkow se we njej pokažu – Eriki Krügerojc, Helle Stoleccyc, Iris Brankačkoweje a Maje Nagloweje.

Teke kreslanki Maje Nagloweje Źilka wjelgin wobźiwujo, ale jo se togo wzdała, něco k tomu basniś. Což wóni z něžneju a wósebneju mócu zwurazniju, to ga se wuběrnje wótbłyšćujo w basnjach Róže Domašcyneje, z jeje zběrki »Die dörfer unter wasser sind in deinem kopf beredt« (poetenladen Verlag 2016). Wšake tych basnjow móžośo teke direktnje we wustajeńcy dožywiś, ga pśi wótsłuchańskej staciji, cytane wót basnikaŕki sameje. Wustajeńca »Ze žeńskecym póglědanim« buźo hyšći až do 19. februara 2026 wiźeś.