Spěwanske swjedźenje, schadźowanka, Sokołske zjězdy, towarstwowe swjedźenje, Domowinske zlěty, serbske festiwale, chórowe zetkanja – stawizny serbskich swjedźenjow, serbskeje swjedźenskeje kultury su bohate a scyła hišće nic dowuslědźene. Njejsu to pak jenož stawizny, tež dźensa so swjedźenska kultura w Serbach stajnje dale wuwiła. Hač su to nowe formaty kaž bands a fans, kwisk a trysk, winowy swjedźeń, kupowy swjedźeń, dworowy swjedźeń, wjesne swjedźenje – štóž we Łužicy bydli, wě, zo je lědma kónc tydźenja bjez swjedźenja. Zda so, zo je bohata swjedźenska kultura za mnohich Serbow, ale tež Němcow, dźensa wosebite přiznamjo Serbow.

Swjedźenje jako přiznamjo byrgarskeje towaršnosće wuwichu so hromadźe z tutej w 19. lětstotku a maja wažnu funkciju za nju, wosebje hladajo na identifikaciju a inkluziju. W Serbach su to husto skrućenje narodneho wědomja kaž tež skrućenje narodneje zhromadnosće a identity. Z wobdźělenjom na swjedźenju wobswědčam přezjednosć z tam zwuraznjenym wobsahom, runočasnje formuje wobdźělenje na swjedźenju identitu wobdźělnikow a spěchuje jich inkluziju do wěsteho towaršnostneho wobłuka. Nimo toho hodźi so »serbski swjedźeń« tež přeco jako wabjenje wo towaršnostnu akceptancu a připóznaće w němskej wokolinje zrozumić.