Dalša zběrka rjada »LitMiks« wobsahuje 23 twórbow 14 młodych awtorkow a awtorow w starobje mjez 15 a 29 lětami. Su so pjera jimali, dokelž chcedźa słyšane być. Pisaja wo tym, nad čimž so wjesela, čemu so směja, što jich tyši abo trapi, za čimž so žedźa. Swoje mysle a začuća chcedźa z nami dźělić. Inspiracije za basnje a prozowe teksty běchu dopomnjenki, datingi, pućowanja a wězo čłowjeske poćahi – radźene, ale tež njeradźene. Połojca w zběrce zastupjenych pisacych da nam swoje prěnje literarne wupłody woptać, wupłody tamnych su hižo zrališe. Husto ći při čitanju napjatych wobsahow dla skoro dych wotrazy. Druhe teksty zaso wolóžeja, zabawjeja abo wubudźeja posměwk. Awtorki a awtorojo dopokazuja, zo zamóža ze swojimi myslemi putać, zo zdokonjeja na wšelake wašnje zwuraznić, hač su hněwni abo zbožowni, rozhorjeni, přesłapjeni, zrudni, zludani abo połni nadźije.