Zešywk ze styrimi pěsnjami w drjewjańskej rěcy Wendlanda w Dolnej Sakskej jo kóńc maja w Chóśebuzu wujšeł. Titel edicije »Ein Lied, welches die Wenden singen« jo wzety z knigłow »Vocabularium Venedicum« fararja Christiana Henniga (1649–1719) z Jasenja. We Wustrowje we Wendlanźe statkujucy jo ewangelski duchowny a rěcywědnik wokolo lěta 1700 zapisał spiw »Katü měs Ninka bayt?« (Chto ma njewjesta byś?). Jo to jadnučki zachowany ludowy spiw w drjewjańskej rěcy. Drjewjańšćina jo była jadna z wjele narěcow pódwjacornych Słowjanow z roda Obodritow. Spiw wó ptaškowej swajźbje jo w zešywku wózjawjony z notami a tekstom w nowodrjewjańskej rěcy, dolnoserbski, górnoserbski a w nimskem pśełožku. Do togo zgónijo cytaŕ něco wó historiskej slězynje. Drjewjańšćina jo w drugej połojcy 18. stolěśa wótemrěła a njejo dotychměst dojśpiła staw pisneje rěcy. Z fotami a reprodukcijami ilustrěrowana edicija pokazujo ako faksimile teke zapisk w cerkwinych knigłach Wustrowa wó smjerśi 88-lětneje Emerentz Schultze. Wóna jo była kaž, se groni, slědna wósoba, kótaraž jo drjewjańsku rěc ako maminu rěc wuměła. Wobznanijo se, až wóna jo togodla dejała pśiś, aby w Görde pśed krajnym knězom w swójej rěcy wulicowała a spiwała. Dnja 3. oktobra lěta 1756 jo wóna wumrěła.

Slěduju tśi dalšne pěsni w nowodrjewjańskej rěcy, tejerownosći w górno- a dolnoserbskej rěcy a z nimskimi pśestajenjami: »Vibodraitaj vaitadzai« (Obodritske ryśarje) na staroserbsku melodiju »Serbow dobyśa«, »Dod Bornaimairo« (Smjerś Barnimira) na melodiju staroserbskego spiwa »Padnjony Pan« a »Storoi bör mo viltiaj dör« (Stary bur ma wjeliki dwór, pó engelskem źiśecem spiwje »Old Mac Donald Had A Farm«). Ediciju jo rěcnje pśewóźował česki rěcywědnik dr. Vladislav Knoll z Pragi, tuchylu nejlěpšy znajaŕ drjewjańskeje rěcy. Wše styri spiwy w drjewjańskej rěcy eksistěruju nagrawane w rozgłosowej kwaliśe wót Mathiasa Kließlinga (Tonstudio Cottbus, 2021).