Justyna Michniuk: Tradycje i zwyczaje na Dolnych Łużycach (NOVAE RES, 2026, 334 b.)Publikacija dr. Justyny Michniuk »Tradycje i zwyczaje na Dolnych Łużycach« (NOVAE RES 2025) su knigły, kótarež zbližyju cytarjeju na pśewšo pśistupnu wašnju swět małego, ale pśewšo zajmnego zgromaźeństwa – Łužyskich Serbow. Awtorka nawězujo na temu, kótaraž njejo jano wuznamna z etnografiskego wida abo we wobłuku slěźenja wó kulturje granicnych regionow, ale teke w konteksće źinsajšnych diskusijow wó identiśe, dopomnjeśu a zdźaržanju kulturnego derbstwa pśedmjat wjelikeje aktualnosći. Na jadnom boce stoje knigły na solidnem wědomnostnem fundamenśe, na drugem boce cytaju se pśisamem kaž wulicowańko wó jadnom městnje, kótarež jo lažało dłujki cas někak zboka našogo wšednego zaznaśa za někogo, kenž jo pśepórał cełe žywjenje w Gubinje, pśi nimsko-pólskej granicy, ceło blisko wopisowanego regiona.

Nejwětša móc publikacije lažy w tom, až njejo nastała bźezwuwześnje za pisańskim blidom. Justyna Michniuk jo pósrědnjonu wědu nazběrała pśez pólne slěźenje, z wobydlarjami powědała, jich žywjenje wobglědowała a se wósobinski wobźěliła na swěźenjach a lokalnych zarědowanjach. Pśez to njejsu jeje knigły žedne suche wopisowanje tradicijow, ale skerjej rozpšawa wó zmakanjach z luźimi a jich kulturu. Awtorka wjeźo cytarja pśez rytmus swěźeńskego lěta a pokazujo wóznam swěźenjow, nałogow a symbolow, kótarež su pśez generacije wutwórili lokalnu zgromadnosć. Rownocasnje se jej póraźijo, zapópadnuś pśechod mjazy tradicionalneju kulturu a pśibytnosću, w kótarejž ma wjele nałogow swójo městno znowego namakaś.

Rozgrono z dr. Justynu Michniuk

Premjera pólskich knigłow ›Tradycje i zwyczaje na Dolnych Łużycach‹ wó serbskich tradicijach a nałogach w Dolnej Łužycy jo mimo. Kake su Twóje zaśišće pó prědnych zmakanjach z cytarjami?

Som w zajźonem lěśe měła sedym zarědowanjow, na kótarychž som mógała swóje knigły zajmcam pśedstajiś. Dalšne zmakanja planuju lětosa w Póznanju, Torunju, Bytowje na Kašubach, w Opolu a Zelenej Górje.

Serbsko-pólska slěźaŕka a awtorka z wósebnym zajmom za serbske nałogi w Dolnej Łužycy, narodne drastwy a starosłowjańske tradicije. Foto: priwatne Dotychměst su byli pśedewšym regionalne zmakanja, wušej togo jadno teke we Waršawje a dwě online ze wšakorakimi cilowymi kupkami. Som wjelgin pozitiwnje pśechwatana wó wjelikem zajmje luźi na publikaciji a tejerownosći spokojom z licbu gósći, kenž su mójim pśepšosenjam slědowali. Teke pśez socialne medije som dostała rěd wósobinskich wótgłosow. Tuchylu jo něco wušej 60 % nakłada pśedanego. Prědny nakład knigłow wšak licy jano tśista eksemplarow.