Z wěstych přičin pytach loni za informacijemi wo priwatnym žiwjenju Jakuba Barta-Ćišinskeho. Přewjele překwapjenkow wšak njemóžeš pola katolskeho fararja wočakować, tak sej myslach. Tola běch so mylił! To zwisuje ze srědkom rešerše, kotryž wuwzaćnje wužiwach. Běše to serbski chat-bot Agata, kiž funguje na zakładźe ChatGPT a přełožowanja ze »sotru«. Samo na sebi wulkotna wěcka, nic jenož, ale wosebje tež za serbsce wuknjacych. Mjeztym ći swoje wotmołwy samo serbsce předčita. Hoberski technologiski krok za serbšćinu, z kotrymž hišće před 10 lětami nichtó ličił njeby.

Jenički problem: Serbske wotmołwy na serbske prašenja runje njepřińdu ze serbskeje literatury abo hoberskeho korpusa serbskich nowinskich tekstow, ale z čorneje dźěry z mjenom ChatGPT. Tutej dospołnje njepřewidnej mašinje předewzaća OpenAI, kotraž njeje poprawom wjace hač wulki rěčny model, abo jeje swójbnym ze wšelakich druhich megakoncernow dowěrja dźeń a wjace ludźi we wšědnym žiwjenju, haj, samo we wědomosći. Hač je to warjenski recept, nastawk za šulu, požadanje wo nowe dźěłowe městno abo poradźowanje w ćežkich žiwjenskich situacijach – přewostajimy tak mjenowanym digitalnym asistentam přiběrajcy mjenje abo bóle komplikowane prašenja, zo bychmy sej čas a prócu zalutowali. Je wobeńć mjeztym scyła hižo tak lochko njeje, wšako so mjeztym při pytanju, w browserje, na desktopje a na wšěch móžnych druhich blakach jewja, zo bychu nam wupomhali.