Loni w jutrowniku postajichu zornowcowu postawu z mjenom ›Błótowčanka‹ na Lubinskim dwórnišćowym naměsće. Měješe to »potwjerdźace wu-znaće k serbskemu sydlenskemu rumej« być, kotremuž město w lěće 2016 oficialnje přistupi. Aktiwnje chcedźa serbske namrěwstwo spěchować a widźomnosć w zjawnym rumje polěpšić. Tehdy sformulowa Kolektiw Wakuum, kotremuž přisłušamoj, zjawny list na město.

W tutym pisachmy, zo běše intencija postajenja postawy prawa, »přesadźenje pak skutkuje kaž symbol za strukturelnu njewidźomnosć, kotraž špiheluje, kak so prezenca Delnjoserbow:kow do dźensnišeho časa skrjesli, wotpolitizuje a marginalizuje.  Město posylnjowanja widźomnosće serbskich stawiznow so za znamjo kolonialneje kontinuity rozsudźichu: Idealizowana žona w narodnej drasće, kotraž so folkloristisce sprostnjena, anonymizowana a kulturnje zdalena zwobraznja. Zo jeje wobličo Friedźe Völkner a drasta Marze Morgenstern słuša, wo tym žane słowčko.«