Čuju so jara česćeny, zo směm tule swoje dopomnjenki na basnika, spisowaćela, dokumentarja, redaktora a zahoriteho Serba Bena Budarja napisać. Wjelelětne přećelstwo wjedźe mje k tomu, so wosobinsce zwuraznjeć, a poprawom ani hinak njemóžu.

Kóžde zetkanje z nim bě za mnje žadne, połne měra a wutrobnosće. Móhł rjec, zo – kaž by basnik prajił – běchu to wokomiki słónca, Beno Budar běše mjenujcy w mojich wočach idealny Serb: přećelny, mudry, čestny a zdobom wjesoły; lubowacy swój narod, swoju domiznu, swoju kulturu a maćeršćinu. Zdobom wědźeše jara derje, kajke je městno małeho naroda na swěće. W pomjatku rezonuje mi Benowa baseń ›Naš kusk zemje‹, w kotrejž basnik skrótka a jadriwje narod Serbow charakterizuje:

»Smy swójbička, zo ani za wójnu / njeběchmy přičina – cyłoh lěttysaca!« Hdyž tajke něšto čitaš, by rady tajkej swójbje přisłušał. Wosebje w dźensnišim strašnym swěće.

Bena Budarja zeznach někak srjedź dźewjećdźesatych lět 20. lětstotka. Zetkawachmoj so na wšelakich městnach a we wšelakich situacijach. W Budyskej redakciji dźěćaceho časopisa Płomjo měješe stajnje tójšto terminow, ale kusk chwile za wutrobnu rozmołwu je wón přeco namakał. Zwjetša zetkachmoj so na hižo legendarnych Mjezynarodnych swjedźenjach serbskeje poezije. Po měnjenju jich organizatora Benedikta Dyrlicha bě Budar jenički basnik, kiž wobdźěli so na wšěch lětnikach.