Swj. Ławrjenc na noze kelucha z lěta 1646 (hlej horjeka).
W špihelu swojich swjatych
Lětsa w lěću swjećitej fara Chrósćicy kaž tež cyła wjes swoje 800lětne prěnje naspomnjenje.
Napohlad jubilejneje wsy. Foto: Jens Buliš. Zakład tutoho jubileja je wopismo 19. meje 1225, kotrež so dźensa w archiwje klóštra Marijineje hwězdy chowa. Mišnjanski biskop Bruno II. (wot Porstendorfa, knježeše 1209–1228)1 poswjeći na tutym dnju Kamjensku cyrkej swjateju Filipa a Jakuba. Poswjećenje sta so na přeće a iniciatiwu Kamjenskeho knjeza Bjarnata II. wot Vesty (wokoło 1191–1245), kotryž bě město załožił a cyrkej po wohenju zaso natwarił. Na kóncu dokumenta mjenuje so cyły rjad wosobow, kotrež wobswědča wopismo swjatočneho po-dawka, mjez nimi někotři duchowni, ale tež zemjenjo z wokoliny. Štwórty wot zady je »Henricus de Crostiz«, w rjedźe swědkow, kotřiž so jako »layci« wupokazuja.2
Hendrich, kotrehož přimjeno »de Crostiz« lětuši jubilej wopodstatnja, słušeše najskerje k družinje knjezow wot Vesty. Zo Hendrich k ministerialam biskopa słušeše, drje je mjenje prawdźepodobne. W tehdyšim času, jako tak a tak jenož mało pismow mějachu, je to jeničke naspomnjenje tutoho Hendricha. Wot biskopskeho přewodnika pak bychmy tohodla wočakowali, zo jeho husćišo jako swědka we wokolinje biskopa zetkamy.
