Tradicionelna adwentnicka Zwězka serbskich wuměłcow z.t. jo se pśewjadła dnja 13.12.2024 w Budyšynje w Röhrscheidtowej bastaji Serbskego ludowego ansambla. Južo wót zeger 16:30 su se cłonki zmakali na pśijazne rozgrona pśi tasce kafeja z gódownym klěbom. Něco pózdźej jo pśedsedaŕ zwězka Jan Bilk wótwórił głownu zgromaźinu ze swójeju rozpšawu z naglědneju licbu lětosnych aktiwitow cłonkow, a pśibytne su mógali se teke wugroniś k swójim aktiwitam.

To jo cynił mjazy drugim muzikowy kritikaŕ, dramaturg a režiser Peter Wittig z Barlinja, kenž jo pokazał na wurědne źiwadłowe graśe Omphale, kótarež jo se pśedstajiło w Barlinju. Rězbaŕ Thomas Schwarz ze Slěpego jo pokazał pśibytnym krotki film wó nowem projekśe w Nowem Miłorazu. Ze źěłaŕnicki mólaŕki Maje Nagloweje jo se pokazał dalšny krotkofilm. Młody muzikaŕ, producent, komponist, aranžer, instrumentalny wucabnik, bandleader a spiwaŕ Syman Hejduška jo twórił spódobny znijucy mósćik za klawěrom sejźecy. Něgajšna wjednica Ludowego nakładnistwa Domowina a wudawaŕka Marka Maćijowa jo za tśeśi adwentski tyźeń pśipowěźeła, až wujdu knigły »Serbstwo, quo vadis?« ze 19 esejami awtorow a awtorkow z Górneje a Dolneje Łužyce. Zgromaźina jo teke wuzwóliła Symana Hejdušku za pśichodnu legislaturu (2025–2029) do zwězkowego pśedsedaŕstwa Domowiny. Dalšne cłonki ZSW su cytali swoje basni a teksty. Głowna zgromaźina, zwězana z adwentnicku, jo wěcej nježli jano zmakanje krotko do gód.Jo zrazom fachowa wuměna mjazy kolegami a casy nastawaju nowe mysli za dalšne zgromadne wuměłske statkowanje. Zwězk serbskich wuměłcow ma aktualnje 75 cłonkow. Pśibytnych jo było wokoło 30, mjazy nimi tśo z Dolneje Łužyce.

JUSTYNA MICHNIUK