Widźał sym pupki so pukać

a rozkćěwać do kćenjow młódnych.

Słyšał sym kokulu kukać

a do polow wozyć so płódnych.

Widźał sym štomy so žołćić

a z lisćom so pisanić holu.

Wuknył sym čłowjeka česćić

a za dźěło krućić sej wolu.

Dopomnju so tež,

zo spóznał sym smjerć.

Widźach ju po kraju běhać

a po swójbach hromadźić nopy.

Widźał sym třěchi so zběhać

a na polach palić so snopy.

Pomhał sym wotrywać rowy

a do kašćow zběrał sym niskich

zwostate kosće a hłowy

tehd’ padnjenych wojakow pólskich.

   JURIJ KOCH

Baseń basnika-jubilara z lěta 1957 je wozjewjena w knižce

»Nadróžny koncert« (1965) a w rjedźe Serbska poezija, 27 (LND 1989).