W rjedźe ›Serbska biblioteka‹ wudawa LND wuznamne twórby serbskeho literarneho herbstwa a načasneje literatury w němskej rěči. 14. zwjazk je wuběr twórbow basnicy Róže Domašcyneje. Wona steji za swójsku poetisku rěč, w serbšćinje kaž w němčinje. Mjez rěčomaj twori přechodne pasma – rědki fenomen. Jeje lyriske teksty
»njewotbłyšćuja jenož jednu woprawdźitosć, hižo scyła žanu specifisce serbsku, ale woprawdźitosće w pluralu, potajkim wšelakorosć móžnych swětow«, wuzběhnje W. Koschmal w dosłowje wudaća. Přidała je swójskim tekstam přebasnjenja lyriki Jurja Chěžki (1917–1944), kotrež płaća jako spočatk a prěni wjeršk moderneje serbskeje poezije.
Wudaće wobsahuje 111 basnjow a prozowych basnjow z třoch lětdźesatkow, mjez nimi jědnaće prěnich wozjewjenjow.
