Młody a njewjazany dóstanje so Krabat do putow čorneho mištra. W Kózłom zeznaje poněčim mašineriju čorneho młyna, kotrejž so po zdaću wuwinyć njemóžeš. Přewodź Krabata a spóznaj hromadźe z nim a druhimi młynskimi, kotre mocy kuzłanje ma a kak zahubny režim přez hłuboke přećelstwo, solidaritu a lubosć přewinješ. Nětko předleži mištersce napisany roman tež hornjoserbsce z ilustracijemi Evy Gaeding. Přełožiłoj staj ju Dušan a Lubina Hajduk-Veljković, kniha je wušła w nakładnistwje Veles. Kapsnu knihu poskićujetej Smolerjec kniharnja a SKI za 15,00 €, dóstanjeće ju tež jako ebook za 9,95 € na stronje veles-verlag.de.