Maslaki nadběhuja wobchody

ćopłych kapow wabja do wupředaća

w pyšnym hołbjencu psyče dny

swjećo božemje z drěmotkami

Kejžorskeje manije rozteptane brjohi

wotpadnu z rozprochnjeneje budki norow

wusmahnjene słónčniki ze zliwkom šlipnu

dowolnikam runjewon mjezwoči

Pod kipity nós cuzbnika sunje

přenajer karanaj dwórskeho piwa

přez tejku do mandźelstwa zakurka

kwasny sanc hrónčko dobrych přećow

Kuzło hordozneje terasy napřećo

z wotpadkami słónčnych chwilow

smjećerjo zaćěrja poslednje runki hołbi

do přećelnišich połobskich honow

   BENEDIKT DYRLICH