Wjacori Serbja so po zapředźenjach do nacionalsocializma k swojim serbskim korjenjam wróćichu a w dalšim žiwjenju
z a Serbstwo skutkowachu. Jedyn tajki pad je Julius Riota, kotryž bě do Druheje swětoweje wójny wosadny farar w Rakecach.
Ze žiwjenja Juliusa Rioty
Wón narodźi so 22. apryla 1901 w Drježdźanach jako syn inženjera při statnej železnicy Juliusa Riotte a jeho mandźelskeje Elisabeth Libussa rodź. Baumann. Po wopyće ludoweje šule w Drježdźanach přeńdźe na Křižny gymnazij, hdźež započa jako mnohostronsce zajimowany šuler awtodidaktisce serbsce wuknyć. Jako student teologije we Wrócławju běše 1923/24 hłowny starši serbskeho studentstwa. Před sto lětami, 10. oktobra 1926, nastupi zastojnstwo jako farar w Rakecach. Běše rady słyšany rěčnik na zeńdźenjach serbskich Sokołow, na studentskich schadźowankach a na Domowinskich zlětach. Wšudźe zdoby sej wulku nahladnosć ze swojim serbskim zapalom a swojej zahorjacej zrěčniwosću.
Mjez 1933 a 1944 bě žiwjenski puć Rioty z politiskich a wosobinskich přičin tajki, zo njemóžeše so po wójnje hižo do Łužicy wróćić.1 W nalěću 1933 zastupi do NSDAP a běše aktiwny čłon Němskich křesćanow (Deutsche Chris-ten, DC). Dale zastupi 1935 do SA, za kotruž skutkowaše jako donošowar w serbskich naležnosćach. 1936 da so tež jako informant za Himmlerowu wěstotnu słužbu (SD) nawabić.2
