Situacija Maśice Serbskeje w Dolnej Łužycy njejo rožojta, jo rowno teke za mnjo ako pśedsedaŕ w mójej mjaztym 20-lětnej »karierje« njespokojeca. Našo cłonkojstwo jo drje nadalej pla někak 20 cłonkow, ale aktiwity w mjenju Maśice stawnje a dalej wóteběraju. To teke z tym zwisujo, až se casy na to zabydnjo, se pla wjelerakich aktiwitow na pólu serbskeje rěcy a kultury ako cłonk našogo towaristwa pokazaś resp. outowaś.

W zachadnem lěśe njejo se nam raźiło – prědny raz pó koronacasu – našu lětnu głownu zgromaźinu pśewjasć. Protest abo kritiku z našych rědow to prowocěrowało njejo. Gaž žedna iniciatiwa z boka mjaztym jano minimalistiskego pśed­sedaŕstwa njepśiźo, pón se jadnorje nic njestanjo. Lětosa pak jo se nam něco wažnego zglucyło – w januarje smy diskutěrowali k temje »Quo Vadis – Maśica«.

14 zapisanych Maśicarjow a Maśicaŕkow jo se wobźěliło – tak wjele ako žednje w slědnych 15 lětach na našych głownych zgromaźinach. Z Górneje Łužyce jo teke pśedsedaŕka Maćice Serbskeje pśišła, což pokažo na wóznam takeje diskusije­.

Wuslědk jo slědujucy był:

Maśica Serbska dej wóstaś a dalej źěłaś ako popularnowědomnostne towaristwo, kótarež kubłańske źěło wugbajo a serbsku identitu teke zasej wěcej na jsach D Grafika: olneje Łužyce zmócnijo.