Zawod
Wot zašłeje hłowneje zhromadźizny, 29. měrca 2025, je so předsydstwo regularnje pjeć króć zetkało. Posedźenje w Delnjej Łužicy, kotrež bě planowane 2024, smy nachwatali 23. junija 2025 w Choćebuskim Serbskim domje. Wopyt bě zwjazany z rozmołwu wjednicy ABC, Emiliju Němcec.
Aktualnje ma Maćica Serbska 105 čłonow. Wot zašłeje hłowneje zhromadźizny sem zemrě jedyn čłon, dwaj staj přistupiłoj.
Sponsoram Maćicy Serbskeje kaž tež wšitkim darićelam darneho abonementa Rozhlada so wutrobnje dźakujemy.
Dźěłowe ćežišća 2025/2026
Wustawki
Loni na hłownej zhromadźiznje schwalichmy nowu wersiju towarstwowych wustawkow. Wěcneho zmylka dla dyrbjachmy jednu pasažu w nowej wersiji hišće raz předźěłać a na nimorjadnej hłownej zhromadźiznje dnja 17. septembra wobzamknyć. Tutu wersiju potom hamtske sudnistwo a po nim tež financny zarjad přiwzaštej. Na internetnej stronje Maćicy su mjeztym wšitke tři rěčne wersije přistupne – oficialnje płaćiwa je jenož němskorěčna.
Zhromadny projekt ze Serbskej Murju »Mudrišo z Maćicu«
Krótko do hłowneje zhromadźizny 2025 smy startowali kooperaciski projekt z młodźinskim towarstwom Serbska Murja.1 Na instagramowym kanalu Serbskeje murje prezentujemy přinoški w rubrice »Mudrišo z Maćicu«. Maćicarjo přidźěłaja k tomu wobsahowy material, młodźi ludźo Serbskeje Murje zestajeja z toho wotpowědne krótke přinoški a je grafisce wuhotuja. Mjeztym je so hižo 14 přinoškow na instagramowej stronje »Serbska Murja« wozjewiło.