Za Minu – z tym jo měnjona dolnoserbska basnikaŕka Mina Witkojc. Južo pśed někotarymi mjasecami jo wujšła cd z nowymi kompozicijami někotarych jeje basni. Muzikaliski stojtej za projektom serbska jazzowa spiwaŕka Walburga Wałdźic a pólska wiolinistka Izabela Kałduńska. Źewjeś basnjow Miny Witkojc jo było pśi tom lyriska pśedłoga. Wuběrk njejo pśechwatajucy. Su to basni, kótarež su se w muzikowych stawiznach južo cesto komponěrowali, jadnorje dokulaž se nejlěpjej góźe za komponěrowanje. Nic na kóńcu, dokulaž wopisuju wěcej, ako se na prědne póglědnjenje zda. Teksty tych basnjow słušaju k nejwěcej raźonym awtorki.

Wěcej jadnore, skerjej folkloristiske basni Miny Witkojc, pominaju wót wšogo zachopjeńka jadnu wěstu muzikalisku barwu, wěsty zuk. Jo śěžko, snaź samo njemóžne, je muzikaliski hynac interpretěrowaś, se muzikaliski wześ rum. Pśi komponěrowanju źo ga teke wó muziku a njeby kśěł, až wóna stoj we sni basnistwa. Nejwěcej znate basni Miny Witkojc ako Pšosba k poeziji, Majska noc, We śichej nocy, Póžedanje abo Kólebawka bituju pak rum za wšakorake wašnje skomponěrowanja. Jich forma a struktura stej wušej togo pódobnej na songteksty. Tak móžo pśisłuchaŕ jim lažčej slědowaś.