Srjedź junija přeprosy Lěwica do žurle Serbskeho domu, zo by spominała na spisowaćela Jurja Brězana (1916–2006). Před 10 lětami bě Lěwica na stoćiny spisowaćela spominała, jako sej swoju kandidatku za Zwjazkowy sejm Caren Lay na čitanje z jeho knihi »Der Gymnasiast« přeprosy. Lětsa předčita znowa do Zwjazkoweho sejma wuzwolena Lay wurězki z prěnjeho dźěla trilogije »Feliks Hanuš«. Hanuš zesrěba jako młody šuler Budyskeho gymnazija powětr kónc 1920tych, spočatk 1930tych lět. Z tekstow Brězana běchu zastróžowace paralele k dźensnišemu časej a k zesylnjenju prawicarskich mocow spóznać.

Postrowne słowa w mjenje prezidija zwjazkoweho předsydstwa a předsydy Domowiny přednjese Bjarnat Cyž, wopominajo wosebje Brězana, kotryž nawjedowaše serbskich brigadnikow při natwarjenju noweho Serbskeho doma.

Optimistisce rozprawješe přichodna dźowka dr. Beata Brězanowa, kotraž dale w Budyskim domje Brězana bydli, kak je so swójbje z priwatneje iniciatiwy poradźiło, wopomnjensku taflu při domje připrawić, a kak wuspěšna běše stacija šulerskeho projekta při originalnym Brězanowym pisanskim blidźe. Spočatk junija mjenujcy běštej Serbske šulske towarstwo a Domowina za 170 serbsce rěčacych a wuknjacych šulerjow sedmych lětnikow projektny dźeń na slědach Jurja Březana w Budyšinje přewjedłoj.