Hdyž sym w chwatku a přede mnu zawrěje so naraz zawěra železnicy, da sym njeměrny a njesćerpny. Kreatiwne wokomiki to cyle wěsće njejsu. Hinak bě to pola awtorki Sabiny Bauer-Helpertoweje. Před zawěru w Gersdorfje pola Zhorjelca stejo dósta wona nastork, zahajić knižny projekt wo žiwjenskich dopomnjenkach swojeho serbskeho pradźěda. Přetož Gersdorf – tu bě tola něšto … Tute městno jewješe so tola w jeho dźenikach!

Biografiski roman »Johann Zautes Lebensfahrt« je drje hač na jednotliwe serbske sady, wobroty a mjena němsce spisany, wopisuje pak žiwjenje Serba wot kolebki hač na mary. Jan Całta narodźi so 1839 w Bóšicach pola Njeswačidła a časny swět wopušći 1909 w Bójswecach sewjernje Korzymja. A mjez tutymaj lětomaj wothrawaše so bohate žiwjenje, do kotrehož so zanurimy.

Stawizny so nam njepředstajeja, stawizny dožiwjamy! Wopytowarjo kina a wirtuelneho swěta wědźa, što je avatar, a jako čitar-avatar sym Jan Całta. Zalězu sej do kože, do róle druheho čłowjeka a dožiwjam stawizny ze swojimaj wočomaj a swójskimi začućemi. Dźělu wjeselo a zbožo z Janom Całtu, ale tež strach a dušine čwěle. Awtorka je jako fararka na wuměnku a bywša dušepastyrka w chorownjach za to trěbny rjemjeslniski grat sobu přinjesła. Do ludźi so začuwać a jich zrozumić wuknyć bě jeje profesija, a tohodla so nam metamorfoza tež lochce poradźi.