Na zahajenskim wječoru Kamjenskeho jubilejneho swjedźenja pjatk, dnja 15. meje, wotmě so wotewrjenje wosebiteje wustajeńcy »Aberglaube und Magie« Zapadnołužiskeho muzeja w Kamjencu.

Wustajeńca, kotruž pokazaja hač klětušemu aprylej, bu po přeću města – respektiwnje měšćanostu – z widom na 800lětny jubilej koncipowana a steji we hłownym, staroměšćanskim dźělu muzeja ›Elementarium‹.

Na zarjadowanskim wječoru poda měšćanosta Roland Dantz w postrownym słowje krótki dohlad do inicialneho dźěla załoženja wustajeńcy. Na nim stej so mjez druhim Kulturny rum a Serbski institut wobdźěliłoj. Wobsahowy zastup poda knjeni dr. Hozyna. Jedna centralna mysl za přistup k temje je, zo so to, štož so po zwučenym kategoriskim wašnju myslenja jako přiwěrkojtosć rozumi, wot časoweho a situatiwneho zaramikowanja wotwisuje, zdźěla tež z perspektiwy mocy. W srjedźowěku posudźowaše cyrkej formy ludoweje nabožnosće zdźěla jako přiwěrkojte. Po reformaciji płaćachu pola lutherskich duchownych katolske wašnja a jednanja jako přiwěrkojte abo njesprawne. Z moderneje perspektiwy pak su jednotliwe stejišća z doby rozswětlerstwa hižo zaso skoro absurdne.