Nedaleko od Trenčína ... spěwamy z lóštom tež w Serbach na našich swjedźenjach. Tola hdźe tute město poprawom je? Słowakski Trenčín leži hnydom za čěskej mjezu a je lětsa zhromadnje z finskim Oulu kulturna stolica Europy. Pokazuje so wopytowarjam jako srěnjowulke město (ma někak jenak wjele wobydlerjow kaž Zhorjelc) při šěrokej rěce Váh, a nad nim trónuje majestetiski srjedźowěkowski hród. Titul kulturneje stolicy njepřinjese do wuzwolenych městow jenož hudźbu, wustajeńcy, festiwale a wuměłske instalacije, ale zmóžni, je za přichod ponowjeć a přeměnjeć.

W Trenčínje, hdźež móžeš wodu wšudźe dožiwjeć, je rěka Váh takrjec žiłka žiwjenja. Z hižo dokónčenym přetworjenjom rěčneje łučiny při jeho prawym brjohu na přirodny park-zetkawanišćo hraje nětko wot kónca septembra dalši měšćanski projekt takrjec rólu zwjazowaceje linije: Bywši železniski móst (wot 2017 bjez funkcije) su za pěšich a kolesowarjow přetwarili a zwjazuja z tym historiski centrum z nowšim měšćanskim dźělom, kotrejž stej dotal chětro wot so wotdźělenej byłoj.

Rěka Váh sama je woblubowana pola rybarjow, sportowych čołmikowarjow a płuwarjow, a na jeje brjohomaj so derje běha, kolesuje, zabawja a wotpočuje. Hromadźe ze studnju wódneho muža Valentina na torhošću, wokoło kotrehož powědaja sej ludźo tu baje, a z dalšimi zajimawymi wodotryskami skići Trenčín zaćišć města, hdźež njeje woda prosta kulisa. Wone so z njej identifikuje, štož je so tohorunja w projektach, instalacijach a w programje kulturnostolicoweho lěta wotbłyšćało.