Zažnu nazymu 2024 je so team studija LUCIJA prěni raz na puć podał k swědkam časa, kotřiž na zajimawe a čiłe wašnje wo serbskej zašłosći rozprawjeć wědźa. Jich přinoški je sobudźěłaćer LUCIJE Michał Cyž z kameru nahrawał. Z kolegu Janom Breindlom je dotalnych wosom interviewow do něhdźe 100 tematiskich klipow střihał.
Wot lětušich jutrow móže sej je kóždy zajimc na web-stronje www.kalajdoskop.de wobhladać. Nimo na kanalu Youtube šěri so projekt tež na instagramje LUCIJE, wo čož so Franciska Včelichowa stara. Ideju za projekt »kalajdoskop časowych swědkow« bě zrodźił jednaćel SŠT a studija LUCIJE Andreas Ošika, kotryž je 5. februara 2025 njenadźicy zemrěł.
Čemu kalajdoskop słuži? Po puću nowych medijow spřistupnja tež młódšej generaciji dopomnjenki Serbow na po-dawki, kotrež oficialny stawiznopis cyle wosobinsce, cyle subjektiwnje ilustruja. Jako tematiske ćežišća su so w rozmołwach wukristalizowali: Serbja za čas nacionalsocializma a wójny, cyrkej, šula a wukubłanje tehdom kaž tež za čas NDR, dźěło a wosobinske wobkedźbowanja hladajo na wobstejnosće, kotrež su za wěstu dobu typiske. Ale tež k našemu časej so někotryžkuli swědk wupraja. Po tutych kategorijach móža so zajimcy na web-stronje rozhladować abo so prosće po wosobach informować.
Prěni wosmjo powědarjo, kotrychž přinoški je LUCIJA wozjewiła, běchu so mjez 1927 a 1951 narodźili: Slepjanka Frieda Pičulina (*1927 w Nowym Měsće) – wona bě jako předawarka dźěłała, wučerjo Jakub Brankačk z Pančic-Kukowa (*1928 w Měrkowje), Radworčanka Cecilija Hanscyna (*1929 w Boranecach) a Pawoł Rota z Ralbic (*1932 w Sernjanach), bibliotekarka a organistka Chrysta Meškankowa z Budyšina (*1938 w Róžeńće) a profesionalny klankar Měrćin Krawc (*1935 w Pozdecach). Kalajdoskop wudospołnjataj blidarski mišter Jan Wjenk (*1941 we Wotrowje) a molerski mišter Jan Wjesela (*1951 w Radworju). Wonaj dźensa hišće tam bydlitaj, hdźež běštaj so narodźiłoj.
»Nic naposledk nam wo to dźe, zo dokumentujemy rěč ludźi, kotrymž je serbšćina hižo wotmała přewahowacy srědk komunikacije«, praji Božena Braumanowa, rěčna mentorka a za projekt zamołwita. W tutym nastupanju je Frieda Pičulina z Noweho Města (wsy blisko Mułkec) mjez filmowanymi powědarkami wosebitostka: Z njej bě jeničce wowka serbowała, a w šuli wona ani jeničku hodźinu serbšćiny měła njeje.
Projekt »kalajdoskop«, kotryž Załožba za serbski lud podpěruje, njeje z prěnimi wozjewjenjemi zakónčeny. Je zapołoženy na wjacore lěta. Tuž: Štóž rady powěda abo někoho znaje, kotryž by nětčišim a přichodnym generacijam swoje dopomnjenki w tutej formje zawostajił (wosebje rady tež z kruha ewangelskich serbowacych), njech so prošu přizjewi.
Kontakt namakaće na webstronje www.lucija.de.
studijo LUCIJA
