W Drježdźanach bydlaca Leonore Adler (* 1953) praji, zo zaběra so jako wuměłča hłownje ze změnami a poćahami wšeho eksistowaceho, wšojedne hač nastupa to čłowjekow, zwěrjata, rostliny abo tak mjenowanu nježiwu přirodu. Njeeksistuja jasne hranicy, wšo je mjez sobu zwjazane. Kóždy wobraz hodźi so jenož jako wurězk cyłka zrozumić a njeje ženje hotowy. Stajnje zaso so z nim zaběra.
Po studiju na Wysokej šuli za grafiku a knižne wuměłstwo w Lipsku přesydli so Adler 1979 do Drježdźan, hdźež běše sobuzałožićelka wuměłcoweje skupiny »Dresdner Sezession 89«. Lětsa w nalěću zarjadowa so w Galeriji Budissin pod hesłom »Viva la vida loca« wustajeńca z jeje twórbami.
