Z Haslowa pochadźacy Matej Dźisławk (* 1987) je studowany rěčespytnik a skutkuje powołansce jako redaktor Serbskeho rozhłosa. Nimo toho pak je na dalšich polach aktiwny, mjez druhim jako čłon Skupiny Astronawt a jako fotograf. W kategoriji »Łužica – žiwa dwurěčnosć« je jedyn z dobyćerjow wubědźowanja »Simul+ – čiń sobu«. Myto spožči so jemu za projekt »Studijo Lipsk«, kotrehož prěni přinošk je fotowa serija, hdźež wobdźěła Dźisławk wobrazy ze wšelakimi barbami a technikami, zo by je w nowym swětle prezentował. Tak chce pola ludźi zajim za serbski lud budźić. Wobrazy maja so w Drježdźanach, Budyšinje a Lipsku prezentować.
