Isa Bryccyna – Lěs před přibrjohom, 2021, jehłowa rytwa, 20 × 20 cm
Po tym zo je so wuměłča a knižna wuhotowarka Isa Bryccyna (* 1963) za čas studija z wurywanjom z jehłu zaběrała, je so před něhdźe pjeć lětami rozsudźiła so zaso nadrobnišo tutej technice wěnować a kupi sej prasu. Wobsahowje rozestaja so na přikład z krajinami. Tute jehłowe rytwy nastanu po reelnych skicach, kotrež zhotowi, hdyž je we Łužicy a zwonka njeje po puću. Při tym zamóže sej jednotliwe městna a tam knježacu atmosferu zaso do pomjatka zwołać a we wobrazu zwěčnić. Dalša tema su figury hłowow, z kotrymiž načasne towaršnostne zjawy komentuje. Nimo toho wuhotuje grafiske dźěła kaž wšelake karty jako jehłowe rytwy. Dźěl tutych twórbow wustaja Bryccyna lětsa w Žitawje.
