Tereza Zelnakec (* 2002) pochadźa z Pančic-Kukowa a chodźi na Lessingowy gymnazij w Kamjencu. Je hižo přeco rysowała. W zašłymaj lětomaj pak je so započała intensiwnje z wuměłstwom rozestajeć, při čimž je sej wotpowědne techniki z pomocu knihow a interneta přiswojiła. Najradšo rysuje portrety z wolijowymi barbami a wuhlom.
Tuchwilu so předewšěm z anatomiju čłowjeka zaběra. Swoje wudźěłki prezentuje na Instagramje (rej.zka).
W lěće 2020 spožči so jej w ramiku Europskeho wuměłskeho wubědźowanja myto za šulerjow.