Božena Nawka-Kunysz (1946–2000) wotrosće w Pólskej a we Łužicy a zajimowaše so hižo za šulski čas za wuměłstwo. Po maturje studowaše wot 1965 molerstwo a grafiku na Akademiji tworjaceho wuměłstwa w Krakowje. W běhu wukubłanja přiwobroći so swobodnej a nałožowanej grafice. W Katowicach, hdźež so zasydli, dósta přistup do tamnišeje awantgardistiskeje wuměłskeje sceny. Po studiju skutkowaše jako swobodna grafikarka, ilustratorka a molerka w Pólskej a we Łužicy. Nawka-Kunysz čerpaše při swojim grafiskim tworjenju ze stila, kiž orientowaše so na Krakowskej šuli, a přinjese tak nowy raz a hinaši rukopis do serbskeho wuměłstwa pózdnjeho 20. lětstotka.