Wuměłča Andrea Tiebel-Quast narodźi so w Bad Saarowje a wotrosće w Choćebuzu. W lěće 1985 wopušći Łužicu. Po tym zo je najprjedy w Nižosakskej bydliła a započała wuměłsce skutkować, je wot 1999 we wokolinje Biberacha w Badensko-Württembergskej žiwa. Wot 2009 do 2015 studowaše molerstwo a grafiku na Instituće za wukubłanje we wuměłstwje a wuměłstwowej terapiji w Bochumje. Tiebel-Quast skutkuje na polu molerstwa, skulpturje a instalacije. Při tym wužiwa rady njewšědne materialije. Jeje instalacije su awtentiske a awtobiografiske. Z nimi sposrědkuje wobhladowarjej swoje filozofiske a politiske zmyslenje. Pochad je stajnje zaso so wospjetowaca tema jeje tworjenja. Wo tym swědča tež skulptury z elementami serbskeje narodneje drasty.
