Rukopis w Berlinje bydlaceho ilustratora je mnohim ze serbskich publikacijow znaty. Wo tym swědči mjez druhim jako najrjeńša kniha lěta NDR wuznamjenjena publikacija »Ja kocor Stani« (1983). Uwe Häntsch narodźi so 1949 w Mittelherwigsdorfje pola Žitawy a poda so po maturje w Budyšinje 1971 na studij grafikoweho designa na Wysoku šulu za wuměłstwo w Berlinje. Wot 1976 skutkuje swobodnje. Jeho dźěła sahaja wot knižnych ilustracijow a knižneho wuhotowanja přez typografiske nadawki, wuhotowanje plakatow a cejdejkow hač k grafikowemu a corporate-designej. Titulna kolaža »Held« (Rjek), w kotrejž rozestaja so ze swojim pradźědom, kotrehož mjeno je na wojerskim pomniku w Kulowje zwěčnjene, pochadźa ze serije »Menschen und Quadrupeden«.
