Znajemy jeho bóle přez fota w Serbskich Nowinach hač jako wosobu: nowinskeho fotografa Maćija Bulanka. Na zarjadowanjach jeho lědma pytnješ, hačrunjež wosoby a podawki z bjezposrědnjeje bliskosće dokumentuje. Bulank narodźi so 1956 w Budyšinje, da so na fotografa wukubłać a dźěłaše wot 1974 za Nowu dobu, wot 1991 potom za Serbske Nowiny. Wot lěta 1983 do 1986 absolwowaše dalokostudij fotografije na Wysokej šuli za grafiku a knižne wuměłstwo w Lipsku.
Wokomiki, kotrež z kameru zapopaduje, su přewšo žiwe a maja zdobom wysoku dokumentarisku hódnotu, wo čimž swědča wobrazowe zwjazki z jeho fotografijemi »Land am Klosterwasser« (1993), »Prjedy hač woteńdźeš« (2011) a »W katolskich Serbach« (2012).
Z nowinskeho dźěła, w kotrymž bě móhłrjec čas žiwjenja zakótwjeny, je so loni rozžohnował. Z kameru pak budźe Maćij Bulank dale po puću.
