Mjazy Kalawu a Stareju Darbnju, na krotkem zajtšu Kalawskeje Šwice, namakajo se gatowa krajina Bukowinka-Mukwaŕ (Teichlandschaft Buchwäldchen-Muckwar). Wóna lažy w gmejnje Łukajcyny doł (Luckaitztal) – derje jo dojśpiś wót dwórnišća teje gmejny – a jo źěl pśirodowego parka Dolnołužyski wal. Wót 1997 stoje toś te wokoło 95 hektarow wjelike strony mjazy Bukowinku a Mukwarjom pód šćitom pśirody. Pódla źewjeś (a dalšnych něgajšnych) rybjecych gatow, kótarež su pśed někotarymi stolěśami cisterciensarje zapołožyli, dominěruju wupśestrěte góle toś tu krajinu. Wjeliki wuznam ma wóna źins pśez zwiski k dalšnym biotopam za zasejwobsedlenje bliskich stronow, źož jo něga wuglowa jama była.

Wót 2004 jo pśišło 38 hektarow gatoweje krajiny (to groni 40 procentow pśestrěni) na Załožbu fondsa pśirodowego šćita Bramborskeje. Załožba ma cel, až te z gólu wobrosćone płoni gatoweje krajiny Bukowinka-Mukwaŕ worduju strukturow bogata, pśiroźe bliska měšana góla (stakim z jeglinowymi a listowymi bomami). We zachadnych lětach su južo wšake napšawy pśewjadli, aby gódnotu tamnych žywjeńskich rumow pówušyli.