Olaf Rößler (*1977) wotrosće w Oberseifersdorfje blisko Žitawy a je powołanje hladarja nawuknył. Wot 2006 do 2012 studowaše pola Emanuela Raaba a Martina Deppnera w Bielefeldźe fotografiju, hdźež so jemu wšelake stipendije spožčichu. Rößler skutkuje jako swobodny fotograf a wobrazowy redaktor w Hamburgu. Titulny wobraz pochadźa ze serije »Statok« (Der Hof), fotografowany w južnej Hornjej Łužicy. Na wobrazach je na intimne wašnje hladanje starych přez přiwuznych widźeć. Zdobom charakterizuje so statok jako symbol tworjenja swójbneje tradicije, hdźež dźe wo wobchowanje, hajenje a daledaće wot jedneje generacije na přichodnu. Přiwšěm je pytnyć, kak so tradicija wulkoswójby na wsy rozpušća, dokelž dźěći do města ćahnu. Tak je časowy dokument nastał, kiž tutu změnu na začućapołne a drastiske wašnje pokazuje.