Twórby Wylema Šybarja (1887–1974) su dalej mimoměry woblubowane a chowaju se w muzejach a wjelich bydlenjach jogo błośańskeje domownje. Roźony Wusokanaŕ jo był po wuchojźenju wucabnikojskego seminara w Starej Darbni wucabnik w Mósće, Nowej Cali a Barlinju. W lichem casu jo se zaběrał z wuměłstwom a jo chojźił na kursy pla Hansa Baluscheka (1870–1935) a Hansa Lichta (1876–1935). Wokoło 1935 su nastali prědne krajinowe akwarele jogo domownje. 1944 jo se dla małosłyšanja na wuměńk pśesajźił a do Wusokeje wrośił. Wótněnta jo jano hyšći mólował a se na wšakich wustajeńcach wobźělił. Šybaŕ běšo cłonk Koła serbskich twórjecych wuměłcow a jo dostał mjazy drugim Myto Carla Blechena wót wobwoda Chóśebuza a Wuměłske myto Domowiny.