Ino Jänichen-Kucharska narodźi so 1941 w Budyšinje a studowaše w Drježdźanach architekturu. Hižo za čas studija, kotryž zakónči 1966 jako diplomowa inženjerka, chodźeše přidatnje k powołanskim molerjam na molerstwo a rysowanje. Wosebity zajim měješe nimo toho za zahrodnisku architekturu. Molerske wukubłanje pokročowaše 1970/71 při Waršawskej akademiji tworjaceho wuměłstwa, hdźež studowaše zdobom keramiku. Hač do srjedź 1990tych lět skutkowaše we Waršawje jako swobodna wuměłča a wuhotowarka zahrodow. Pozdźišo dźěłaše jako docentka za molerstwo, keramiku a wuhotowanje zahrodow kaž tež za stawizny zahrodoweho wuměłstwa mjez druhim na ludowymaj uniwersitomaj w Drježdźanach a Budyšinje.
W Carlsbergu pola Chróstawy stwori zahrodu »Paradisino«. Z njeje kaž tež powšitkownje z přirody čerpa za hudźbu so horjaca wuměłča nastorki za swoje tworjenje, mjez druhim tež za našej titulnej keramiskej twórbje: Škla »dopomnjenka na stare domy« poćahuje so na wopušćene a rozpadowace domy.